Promotzione de s'arte cuntemporànea

Sa Regione Sardigna at firmadu s'Acordu de Programma Cuadru pro su progetu "Sensi contemporanei". Sa Regione reconnoschet su valore e sas potentzialidades culturales de s'arte cuntemporànea, pro sas cales finas a como in Sardigna est fartada una polìtica parìvile de amparu e valorizatzione.
Sa Regione Sardigna at firmadu s'Acordu de Programma Cuadru pro su progetu "Sensi contemporanei". Sa Regione reconnoschet su valore e sas potentzialidades culturales de s'arte cuntemporànea, pro sas cales finas a como in Sardigna est fartada una polìtica parìvile de amparu e valorizatzione. Cun custu obietivu, s'assessore de s'Istrutzione Pùblica, Benes Culturales, Informatzione, Ispetàculu e Isport, at leadu impignu a tales chi, pro sa prima borta, b'esseret fintzas sa Sardigna intre de sas Regiones chi ant sutascritu s'Acordu de Programma Cuadru multiregionale pro su progetu "Sensi contemporànei- Promotzione e difusione de s'arte cuntemporànea e sa valorizatzione de cuntestos architetònicos e urbanìsticos in sas Regiones de su Sud de Itàlia". S'istìpula de s'acordu de Programma Cuadru l'ant fata su ministeru de s'Economia e de sas Finantzas, ministeru pro sos Benes e sas Atividades culturales, Fundatzione La Biennale de Venètzia, Regione Sardigna, Abrutzu, Basilicada, Calàbria, Campània, Molise, Pùllia, Sitzìlia.

Sa voluntade est a mirare a fainas chi podent èssere annoadoras in sos territòrios, incoragiare sa crèschida de progetos pilotas interregionales pro s'arte cuntemporànea e poderare sa creatzione de cumpetèntzias parìviles in sa ghia de progetos isperimentales, a livellu de amministratziones regionales e entes locales.
S'ant a realizare fainas de promotzione de su "Mezzogiorno", cun espositziones de artes visivas e de architetura e s'ant a favorèssere sos cuncàmbios e sas relatas cun cuntestos internatzionales in su setore de sas artes visivas, de s'avaloramentu architetònicu e urbanìsticu, de s'isvilupu locale, fintzas pro mèdiu de sa realizatzione de cuncursos natzionales e internatzionales. Sos sugetos firmatàrios de s'APQ punnant a nche buscare unu mètodu cumpartzidu intre ministeros e sas Regiones interessadas favoressat sas fainas de pianificatzione, programmatzione, gestione, atuatzione e cuntrollu de sos interventos e de sos progetos de realizare pro s'arte cuntemporànea. S'at a chircare posca de favorèssere sos protzessos de integratzione orizontale- tra Regiones- e verticale- tra territòrios- pro cumprire sa cooperatzione istitutzionale.

In totu su finantziamentu intregadu a s'APQ est de 7 milliones de èuros pro s'editzione 2006-2008 de su progetu "Sensi contemporanei" e ant buscadu tres macroàreas de interventu.
Sas atziones de sistema cun unu finantziamentu de 3 milliones 196 mìgia èuros pro atividade de coordinamentu, gestione, acumpangiamentu e pro sa comunicatzione. Pro sa promotzione pro mèdiu de initziativas espositivas de architetura, artes visivas e design sunt istados intregados 1 millione e 440 mìgia èuros. Pro sos "Programmi dei sensi" sunt istados intregados 2 milliones e 400 mìgia èuros partzidos intre atividade de formatzione de tècnicos locales pro s'ativatzione e promotzione de polìticas de calidade in campu architetònicu e urbanìsticu (600 mìgia èuros) e pro sustènnere s'istrutzione e s'ativatzione de bandos de cuncursu pro acumprire una calidade progetuale architetònica bona (1 millione e 800 m'gia èuros).

Sas Regiones cherent a detzidere de prus e pedint de pòdere partetzipare, in totu sas fases, a sèberos progetuales chi pertocant a sas atividades de acumpangiamentu, comunicatzione, formatzione, cuncursos e non petzi a sos adòbios subra sa programmatzione territoriale issoro.

Aggiornamento

11/5/2023 - 16:43