Sos printzìpios de su documentàriu

Su primu documentàriu ghiradu in Sardigna est de sos frades Lumière, imbentores de su tzinematògrafu, chi in su 1899 aiant imbiadu in s'ìsula sos operadores issoro pro una "tzineatualidade" cun su tìtulu "Voyage du Roi Humbert Ier en Sardaigne". Pagos minutos pro contare a su pùblicu s'inauguratzione de su monumentu a Vittorio Emanuele in Tàtari.
Su primu documentàriu ghiradu in Sardigna est de sos frades Lumière, imbentores de su tzinematògrafu, chi in su 1899 aiant imbiadu in s'ìsula sos operadores issoro pro una "tzineatualidade" cun su tìtulu "Voyage du Roi Humbert Ier en Sardaigne".
Pagos minutos de immàgines in movimentu pro contare a su pùblicu curiosu e interessadu s'inauguratzione de su monumentu a Vittorio Emanuele in Tàtari, su re e sa reina in vìsita in una miniera, sa cavalcada istòrica in costùmene in Tàtari.
Restauradu pro sos chentu annos de su tzìnema in su 1995 dae sa "Lumière", su documentàriu est istadu dadu in còpia a sa Tzineteca Sarda e como est ogetu de difusione e de istùdiu. Paret difatis chi in custa "tzineatualidade" curtza si siat codificadu un'ischema chi at èssere sighidu dae belle totu sos tzineastas a su mancu finas a sos annos Sessanta, cun pagos e firmos elementos costitutivos: atividade de sos guvernantes, òperas pùblicas, traditziones populares.

Sa Sardigna cumparit in s'ischermu in sos primos annos de su Noighentos in documentàrios, pro mala sorte pèrdidos, de sos cales però connoschimus sos tìtulos sinnificativos: "La Sardegna: usi e costumi", "Visita a una miniera d'argento", "Piccoli mestieri del mare", in prus a su semper presente "Briganti in Sardegna".
Dae sos annos Binti si moltìplicant sas ocasiones de vìsitas de reales e inauguratziones de òperas pùblicas, de bonìficas agràrias e nàschidas de tzitades noas, cun documentàrios comente "Mussolinia" (1932) e "Carbonia" (1941). Sa rapresentatzione de sa Sardigna comente terra antiga e mìtica est presente in su film comente "Nei paesi dell'orbace" de su 1931.

Aggiornamento

11/5/2023 - 16:43