Morfologia numenale

Pro su chi pertocat sa formatzione de s'artìculu determinativu, lòmpidu dae su latinu, su sardu s'assentat in unu logu distintu meda in intro de su grupu de is limbas romanzas. S'artìculu sardu difatis protzedit dae su lat. IPSU(M), IPSA(M), IPSOS, IPSAS, a manera diferente cunforma a su chi costat in is àteras limbas romanzas, in ue su puntu de partèntzia est, pro su prus, ILLU(M): s'artìculu determinativu sardu est duncas "su" (es. su cane "il cane"), "sa" (es: sa croga "la chiocciola"), plurale "sos" (sos canes "i cani"), "sas" (sas crogas "le chiocciole"). Diversu, in parte, est su chi costat in campidanesu e in is àreas linguìsticas de làcana intre is duas macrovariantes, in ue a su plurale s'agatat, tantu a su maschile chi a su feminile, "is": is mìgias "le calze". Pro su chi pertocat sa flessione de is sostantivos, sa formatzione de su plurale est fata pro more de s'impreu de su morfema consonànticu -s: duncas, pro fàghere carchi esempru: singulare baca "vacca"~ plurale bacas "vacche", singulare caddu "cavallo" ~ plurale caddos "cavalli", singulare pee "piede" ~ plurale pees "piedi", singulare banduleri "vagabondo" ~ plurale banduleris "vagabondi". Dae unu puntu de bista istòricu, sugùgiat interessu su de semodare ca custa manera de formare su plurale acumonat su sardu a is limbas romanzas otzidentales, pro esempru a s'ispagnolu, in ue a is singulares a tipu cabra "cabra", currispondent plurales a tipu cabras "cabras", o a su frantzesu, cun chèvre ~ chèvres. In fines tocat de osservare, a pitzu de custu tema, ca is primas orminas de sa situatzione descrita, si podent apubare giai in epìgrafes de edade romana, in sas cales s'agatant nominativos plurales a tipu FILIAS (in logu de su clàssicu FILIAE) e PATRONAS (pro PATRONAE). Pro su chi pertocat is agetivos, signalamus petzi ca custos formant su comparativu cun prus (dae su latinu PRUS). Esempru: grave "pesante", prus grave "più pesante".

Aggiornamento

11/5/2023 - 16:44