Su sistema museale arborensu

Est nàschidu su Sistema museale arborensu, una retza de museos, regortas museales, giassos culturales e ecomuseos de su territòriu provintziale de Aristanis e de àteros territòrios a làcana a cussu aristanesu, pro sos àmbitos de paesàgiu prevìdidos dae su Pianu paesagìsticu regionale. Custu progetu culturale est parte integrante de unu progetu prus ampru de sa Giunta regionale chi punnat a sa costitutzione de su Sistema regionale museale.
In Aristanis est istadu sutascritu su protocollu de intesa chi istituit su Sistema museale arborensu, promòvidu dae s'assessoradu regionale de sos Benes Culturales de sa Provìntzia de Aristanis e dae 25 Comunas. De sinnalare s'importàntzia de sa relata de collaboratzione cun sa Sovrintendèntzia pro sos Benes Archeològicos de Casteddu e Aristanis e s'Universidade.

Su Sistema museale arborensu intre sos obietivos suos de primitia sa cualificatzione e s'afortigamentu de su patrimòniu de benes culturales, ambientales e paesagìsticos presentes in su territòriu pro una integratzione mègius de s'oferta culturale. Si punnat a sa calidade, in antis de totu: chie intrat in su Sistema museale at dèpere tènnere sos rechisitos e respetare sos istandard mìnimos chi ant individuadu pro otènnere su reconnoschimentu dae parte de sa Regione.

S'at a dèpere garantire una fruitzione mègius pro ismanniare su nùmeru de bisitadores de sas istruturas museales e de sos giassos, favorende sa promotzione de atividades a cumone, in particulare intre sas amministratziones prus minores, e frunende un'acaramentu e unu cuncàmbiu de esperièntzias. S'at a punnare posca a valorizare su raportu intre museos e territòriu, cun sa tenta chi sos residentes nde siant sos fruidores primos e chi si diat impèllida noa e ideas pro s'isvilupu locale. Si cheret in prus favorire una relata firma e organizada cun su mundu de s'iscola e de s'Universidade, cun sos insignantes e sos dischentes.