Cìciu Piga

S'istòria de s'esòrdiu poèticu de Cìciu Piga diat pòdere serbire pro dare ànimu a chie provet s'esòrdiu in una cale si siat arte, e, nointames sa farta de sa prima proa, non si disànimet. Non cheret nàrrere nudda a rùere in s'ìnteri chi si cumentzat. Si podet semper torrare a ritzos e sighire a si pesare poscas comente a unu de sos mègius. Su cantadore a bolu nàschidu in Pèrfugas su 3 de maju 1887 fiat cunsideradu in sa bidda che unu talentu meru. Custa fama dd'aiat giutu a cantare in subra de su palcu a 18 annos ebbia contras un'autoridade de s'època, est a nàrrere s'otieresu Zusepe Pirastru. Est de badas a nàrrere chi sa gara fiat agabada male meda pro su giòvanu noitolu chi si nche fiat fuidu. Sos annos imbenientes fiant istados difìtziles pro s'esòrdiu faddidu, ma Piga, sende pitzinnu, fiat ressèssidu a torrare in artu e a si presentare torra in sos palcos fintzas contras a Pirastru mancari dd'esseret timidu. Giumpadu custu impedimentu, sa carriera aiat sighidu sena àteros isbios finas a sa morte acuntèssida in 1972, a 75 annos. Cìciu Piga aiat tentu su fadu de èssere amigu e currispundente de Pedru Casu, su distintu e sàbiu preìderu de Berchidda autore, in prus, de unu ditzionàriu in limba sarda e de sa tradutzione de sa "Divina Commedia". Sas poesias de Cìciu Piga sunt regortas in una publicatzione fata a incuru de sa fìgia e publicada in su 1984.

Aggiornamento

11/5/2023 - 16:44