Antoni Cano

In sa produtzione literària in sardu sa poesia est su gènere prus coerente e diferentziadu, e cussu chi at una produtzione prus manna. Gasi comente cuntesset in sa traditzione toscana clàssica, agatamus iscritores de gabale in cussa sarda. Intre de custos essit a craru Antoni Canu.
A parre de Carlo Dionisotti, su Batorghentos est unu sèculu sena poesia, ma sa froridura o sa crisi de sa poesia de una limba de minoria sunt, finas issas, in relatzione a sos eventos polìticos e a sos movimentos culturales. Sas primas tratas lèbias iscritas de sa poesia sarda s'agatant in su poema atribuidu a Antoni Canu "Sa vitta et sa Morte, et Passione de sanctu Gavinu, Prothu et Januariu".
Canu naschet in Tàtari in finitia de su de XIV sèculos, ma sas novas subra sa bida sua sunt pagas. Fiat unu religiosu e, a pustis de èssere istadu retore de sa bidda de Giave, aiat leadu s'incàrrigu de abate de Sacàrgia e posca fiat istadu ordinadu pìscamu de Bisàrtziu e archipìscamu de Tàtari. Su poemeddu dedicadu a sos màrtires turritanos, giustitziados a s'època de sas pessighiduras de Diocletzianu, resurtat chi est s'òpera literària prus antiga connota in limba sarda. Sunt versos de caràtere agiogràficu chi, moende dae fontes de contos medievales, torrant a propònnere su modellu de sas "Passiones" de sos màrtires. S'intentu de s'autore est de fundare a pitzu de sas figuras de Gavinu, Protu e Gianuàriu s'idea de una Sardigna chi creet in s'identidade sua de pòpulu e de limba e in sa cultura cristiana europea.

Aggiornamento

11/5/2023 - 16:44