Mialinu Pira

Mialinu Pira, pessonàgiu de importu de sa cultura sarda de sa segunda metade de su Noighentos, est unu de sos primos e prus impinnados istudiosos de sa limba sarda e de sos problemas suos, ispintu non dae un'interessu de pagu contu, ma dae unu ligàmine profundu cun sa cultura de su logu suo.
Nàschidu in Vitzi in su 1928. Pesadu in Òschiri, faghet sos istùdios litzeales in Tàtari. Si laureat in Lìteras in Casteddu (cun una tesi subra su dialetu de Vitzi) e semper in Casteddu traballat comente funtzionàriu de su Consìgiu regionale e dae poscas professore de Antropologia culturale in s'ateneu de sa tzitade matessi. Autore de òperas teatrales, s'interessat de poesia e leat a incuru trasmissiones medas de "Radio Sardegna", in ue faeddat su sardu de sa bidda sua cun fortza manna e, a su matessi tempus, cun elegàntzia. In s'òpera sua "Sardegna tra due lingue" (tìtulu dadu finas a una sèrie radiofònica) delìneat sas chistiones de su bilinguismu e de sa diglossia chi bidet su sardu postu semper de prus a unu chirru. In "Sa rivolta dell'oggetto" insistit subra su cuntzetu de sa netzessidade de una rivolutzione pro chi su pòpulu sardu, fintzas a como "ogetu" passivu de istùdios e polìticas tzegas, imparet a si fàghere "sugetu" e a si autoderminare. In su contu "Il villaggio eletronico" tenet un'intuitzione de non crèere subra a unu tempus benidore chi connoschet retzas telemàticas globales. Pro tempus meda discalculadu in bida, a pustis mortu benit festadu fintzas dae chie lu cumbatiat, in particulare a pustis de sa publicatzione pòstuma de "Sos Sinnos".

Aggiornamento

11/5/2023 - 16:44