Antoni Cubeddu

Su reguladore e ordinadore de sa gara poètica a bolu moderna naschet in Otieri su 25 abrile de su 1863. In domo sua sunt amantiosos de s'otava logudoresa. Su babbu Giuanne ponet cantzones satìricas gasi comente si costumat in sa tzitadina posta a peales de su Monte Acutu in cussos ùrtimos annos de sa fine de s'Otighentos. Si contat, in Otieri e finas in s'ereu de sos discendentes suos, ca fiant parentes larganos de padre Luca Cubeddu, su poeta rebelle de sa literadura sarda de su Setighentos. Duncas Antoni Cubeddu s'acherat in manera belle naturale, e agiomai pro deretu de famìlia, a su mundu de sa poesia a bolu, ma, pro more de s'abilesa e sas virtudes suas, nde divenit cun seguria unu de sos protagonistas prus mannos. Sos istudiosos e sos amantiosos li reconnoschent s'idea de fàghere cantare sos poetas in pratza e in su palcu, paghende·los a primu cun unu prèmiu, a pustis in dinari. Sa prima gara de custa genia diat dèpere èssere istada fata, a su chi iscriiat isse etotu in unu sonete e tràmite àteras fontes, su 15 de cabudanni de su 1896 pro sa festa de Nostra Sennora de su Rimèdiu in sa tzitade sua. In realidade, su traballu suo est cussu de apaltadore pro sa manutentzione de fàbricos de sas ferrovias in sotziedades cun àteras pessones. At cantadu pro totu sa bida finas a su 1949. A parre de su chi narant sos amantiosos, teniat una muta de poesia forte e potente e unu tràgiu chi praghiat modulende sa boghe. Morit in Roma su 23 de cabudanni de su 1955 a s'edade de 92 annos.

Aggiornamento

11/5/2023 - 16:44