Vissentu Remundu Porru

Nàschidu in Casteddu in su 1773, Vissentu Porru fiat interessadu, cun àteros intelletuales de su tempus, in sa defensa e in sa valorizatzione de sas traditziones e de sas particularidades culturales sardas.
Intre custas, sa limba fiat s'interessu suo prus mannu, tantu chi, in su 1810, aiat publicadu su "Saggio di grammatica sul dialetto sardo meridionale" e, intre su 1832 e su 1834, su "Nou dizionariu sardu italianu". Siotto Pintor l'aiat definidu "su legisladore de sa limba sarda".
In s'introdutzione a su "Saggio" de su 1810, Porru aiat giai iscobertu s'essèntzia de sa chistione de sa limba autòctona de Sardigna: "Noi Sardi però sembriamo guardare con indifferenza, e quasi con occhio spregevole a quel linguaggio, che dal seno materno traemmo col proprio sangue, e per cui ognuno esser dee naturalmente appassionato". Cun sas òperas suas issu aiat chircadu de pònnere òrdine in una matèria cumplessa e mala a guvernare. In particulare, si fiat ocupadu, comente lìnguista, de su sardu chi connoschiat mègius, cuddu de sa faeddada meridionale de s'ìsula. S'òpera sua est de significu pro duas resones. Porru leat parte a sa pelea manna chi sos intelletuales aiant cumentzadu pro difèndere sa veridade de sas cosas sardas. Isse iscumproat puru, cun fortza sa netzessidade de irrichire sa limba sarda impreende in ue siat netzessàriu, prèstidos dae àteras limbas. Ma sa boghe sua abarrat lìtera morta: sos tempos non fiant cumpridos. Morit in Casteddu in su 1836.

ÒPERAS
Nou dizionariu universali Sardu - Italianu vol. I
Nou dizionariu universali Sardu - Italianu vol. II
Nou dizionariu universali Sardu - Italianu vol. III

Aggiornamento

11/5/2023 - 16:44