Barore Tucone

Est in sa bidda de Buddusò, in su 1885, chi est nàschidu custu betze campione de sa poesia a bolu. A minore est obrigadu a disterrare in Frantza pro si balangiare su pane. Sa pàtria italiana, chi non fiat istada capatza de l'isfamigare, ddu tzèrriat però in su 1915 a cumbàtere pro sa Prima Gherra Mundiale. A s'agabu de sa gherra torrat in s'ìsula e cumentzat a girare sas pratzas pro cantare e creare "otadas" pro sas festas cumandadas. Divenit in pagu tempus unu de sos artistas prus rechestos e connotos. Abarrant mentovados in sos ammentos de pastores e massajos de mesu Sardigna, sos disafios suos cun sos àteros cantadores prus numenados: Remundu Piras, primu tra totus, ma finas Barore Sassu e Peppe Sozu. A bisu de Pàulu Pillonca, s'ùrtima gara de sa bida sua si faghet in su 1968 in sa bidda de Narbolia, in cumpangia de Remundu Piras. Sa morte, in tames, arribat su 24 martzu de s'annu in fatu. Fiat òmine de personalidade manna e de caràtere forte. Unos cantos aversàrios suos ddu timiant mescamente pro sas virtudes poèticas a bolu fortes chi ddu poniant a s'ispissu a cuntierra tostuda cun sos rivales ocasionales. Fiat in manera particulare pibincu in s'argumentatzione e in su sèberu de sas rimas. Impreaiat pro sas otavas suas, comente iscriet Pillonca matessi, una "prendidoria tètera" de sas rimas, sena rughes. Teniat in minusprètziu sas rimas tropu fàtziles, cun sos infinidos presentes e sos partitzìpios passados de sos verbos. Chircaiat in tames sa rima chi nemos isetaiat, ma musicale e geniosa. Amaiat ispantare sa gente chi acudiat a sas garas suas. De Barore Tucone abarrant unas cantas garas registradas in sos ùrtimos annos de sa bida sua.

Aggiornamento

11/5/2023 - 16:44