Frantziscu Màsala

Iscritore in duas limbas, Frantziscu Màsala at publicadu libros de poesia de narrativa, de teatru e de sagìstica, in sardu e in italianu. Sas tradutziones in limbas istràngias testimòniant s'universalidade de sas òperas suas. Est connota sa càrriga polèmica sua alleniada dae un'umanidade desemplada. Sas òperas suas prus importantes sunt su romanzu "Quelli dalle labbra bianche" (1964), sa regorta de poesias "Pane nero" (1956), "Su Connottu" (dramma populare bilingue in collaboratzione cun su regista Gianfranco Mazzoni), "Poesias in duas limbas" (1981), "Il riso sardonico" (1984), "Il dio petrolio" (1986); "Storia del teatro sardo" (1987), "S'Istoria – Condaghe in limba sarda" (1989).
Nàschidu in Nughedu Santu Nicolò su 17 de cabudanni de su 1916. In Roma at leadu sa laùrea in Lìteras. In sa segunda gherra mondiale est istadu a primu in su fronte jugoslavu, posca in su fronte russu, in ue benit feridu in batalla e decoradu "al valore militare". Congedadu, at fatu iscola pro trinta annos in antis in Tàtari, a pustis in Casteddu. Un'afinidade culturale e polìtica longa, acumpangiada dae una forte amighèntzia, lu bident a costàgiu de Emilio Lussu, Aldo Capitini, Giuseppe Dessì e Salvatore Cambosu. Giornalista publitzista, pro chimbanta annos at collaboradu a giornales e rivistas cun artìculos de crìtica literària, artìstica e teatrale. Est istadu presidente de su Prèmiu literàriu in limba sarda "Città di Ozieri" e, in su 1978, de su "Comitadu pro sa limba", chi aiat presentadu sa "Proposta di legge di iniziativa popolare per il bilinguismo perfetto in Sardegna". Est mortu in Casteddu su 23 de ghennàrgiu de su 2007.

ÒPERAS
Quelli dalle labbra bianche
Sa limba est s'istoria de su mundu
Il parroco di Arasolè

Aggiornamento

11/5/2023 - 16:44