Giuanni Lilliu

Giuanni Lilliu, archeòlogu, in prus de àere bogadu a craru sa "reggia nuragica" de Barùmini, at contribuidu cun sos istùdios e s'atividade sua a fàghere a connòschere e a valorizare su patrimòniu culturale paleosardu in totu su mundu. Nàschidu in Barumini in su 1914, allievu de Ugo Rellini in sa "Scuola Archelogica" de Roma, dae su 1943 a su 1955 at traballadu in sa Soprintendèntzia a sas Antighidades de sa Sardigna. Professore ordinàriu de Antighidades Sardas dae su 1955, est istadu pro binti annos Prèside de sa Facultade de Lìteras e Filosofia de s'Universidade de Casteddu. Est professore emèritu, faghet parte de Istitutos iscientìficos medas siat italianos siat istràngios. At fundadu e ghiadu s'Iscola de Ispetzializatzione de Istùdios Sardos de s'Universidade de Casteddu. Dae su 1990 est istadu tzerriadu, ùnicu sardu, a fàghere parte de s'"Accademia dei Lincei". Intre sas òperas suas s'ammentant "La civiltà dei sardi dal neolitico all'età dei nuraghi", Torino 1963, "Sculture della Sardegna nuragica", Casteddu 1966, "La civiltà nuragica", Tàtari,1982, "Cultura e culture", Tàtari, 1995, "Arte e religione nella Sardegna prenuragica", Tàtari, 1999. Est istadu consigeri regionale cun sa Democratzia Cristiana. In sas ùrtimas deghinas de annos est istadu ativu meda pro sa defensa de s'identidade de sa Sardigna e, in particulare, de sa limba sarda. In unu sàgiu famadu de sos annos setanta at creadu e definidu su cuntzetu de sa "costante resistenziale sarda". In su volùmene "Sentidu de libertade", Casteddu, 2004, at regortu sos artìculos e sos sàgios iscritos in limba sarda.

ÒPERAS
La costante resistenziale sarda

Aggiornamento

11/5/2023 - 16:44