Antoni Maria de Estertzili

In Sardigna finas in su prus mavele e ispèrdidu bidditzolu de monte, sas Rapresentatziones Sagradas aiant tentu un'isparghidura manna e fiant istadas inscenadas e retzitadas durante sas tzerimònias de sa Chida Santa, divenende una traditzione chi aturat galu como.
Esempros de Rapresentatziones Sagradas in sardu s'agatant in paritzos autores de su Seschentos, ma si distinghent, intre totus, cussos insertados in unu còdighe de paperi voluminosu chistidu galu manoscritu in sos archìvios de sa Biblioteca Universitària de Casteddu: "Il Libro delle Commedie" de unu caputzinu, su Padre Antoni Maria dae Estertzili. Sa regorta tenet unu tìtulu ispanniolu "Libro de Comedias escripto por Fray Antonio Maria de Estercili sacerdote capuchino en sellury 9bre a 18 ano 1688". Est unu còdighe miscellàneu in paperi, signadu m193, formadu 32mo, rilegadu in pergamena e partzidu in duos. In intro s'agatant òperas teatrales de annestru religiosu. Fintzas a pagu tempus a como bi fiat sa cumbintzione chi sas "comedias", su Padre caputzinu de Estertzili ddas aiat iscritas in ispanniolu, e custu dae cando unu de sos primos cronistas de sos acadessimentos literàrios de sa Sardigna, Giuanne Sioto Pintor, fiat rutu in trampa e aiat faddidu pro neghe de sas didascalias in castillianu. Fiat istadu unu istudiosu chi istaiat in Bèlgiu, Morin, a acrarare chi, in tames, sa limba impitada est su sardu (in sa variante meridionale) cun sas didascalias ebbia in ispanniolu. Sa segunda parte de sa regorta est fata imbetzes de paritzos disponimentos eclesiàsticos e canònicos. Si podet dare chi custos fògios fiant istados annantos a su libru pro sa rilegadura.

Aggiornamento

11/5/2023 - 16:44